آش خاصك يا الرشيدية الضحك والتكركير والإدارة مشات في خبر كان وغبار المجلس البلدي عليك يطير لا بنية تحتية ولا مرافق باش المواطن يبقى ناعس ميفيق وفي الإدارة بلكذوب يتيق جيبو ليه الضحك والنهيق وخرجان الطريق ، ها الحزاب السياسية كتغني المجتمع المدني كيشطح وساحة البرلمانيين عطاة الريحة اولينة كل شهر بواحد من قبة البرلمان جاي اطنز على الشعب و يزرع ويبيع البرتقال وكثر عليه القيل والقال ولكن حتى شي حد مفيدّيه
ميْدير ، صحاب تافيلالت هزو البندير خرجوا من كل الأحياء وحتى من حي تاركة اولادالحاج اوادالدهب الحدب ، شطحوا وردحوا ، واش خاصك يا لعريان مهرجان الضحك وُكان ، لو درنا ليكم محاضرة تسلّلتم بحال الشفّارة ، والله معكم الرشيدية تعرف الخسارة ، قاعة الأفراح للمحاضرات خاوية ، المركب الثقافي أطلال تبكي عليها الأموات والأحياء ، ديور الشباب مهجورة يا لحباب ، جمعيات تغرد في السراب ، المواطن شبع تراب ، ولكن نحلف بحلوفي حتى ندعي في سجودي على كل من كان حيلة وسباب لهذه المدينة الغنية بثروتها وتخلف رجالها .
المدينة جميلة فيها المرافق ، قادوا الطريق ، المواطن واعي بالقضية فتحوا قاعات للقراءة والمطالعة ، كلشي زين ومقاد خاصنا غير نضحكوا ونشطحوا ونتبردوا والمسؤولين في الميزانية يلعبوا …
معاريف بريس
www.maarifpress.com